Kääpa koolin peeti 3.-7. märdikuu päivil võro keele nädälit. Õgal pääväl tetti põnnõvit tegemisi ja olli esineja.
Iispäävä tull kuuli folkluuriandsambli Käokiräs, 1.-5.klassi latsiga laulti ja tandsiti.
Tõõsõpäävä panti tiidmise proovilõ võrokiildse kuldvillakuga.
Kolmapäävä oll Kääpa koolin külän Saarõ Hipp, timä suurõs tsihis om võro keele edendämine ja nuuri sekkä viimine. Edimält kõnõl Hipp hindäst, näudäs määdsit ütismeediä kotussit tä tarvitas, noidõ kaudu tä võro kiilt inemistele lähembäle tuu. Viil kõnõl Hipp võro keele tähtsüsest ja võro keelest ku mi kultuuripärändist. Päävä lõpun tetti 7.-9.klassi latsiga uma klassi kamban lühkese video, sääl kõnõldi õnnõ võro kiilt.
Neläpäävä andsõ kontsõrdi Ilvese Aapo, kiä laulsõ ja mängse kitra. Vahepääl kõnõli nalakit lugusit võro keelen. Samal pääväl 1.-4.klassi opilasõ võtsõva ossa pallo huvvi tekutänu võro kiisite lugudõ lugõmisvõistlusõst.
Võro keele nätäl lõpõtõdi huugsalt, kuun oppaja Aivaga lüüdi tandsu. Muidogi olli tandsuloo võro keelen.